نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[محمود عبد السم]

شكرا جيد جدا

[Ah.Farid]

استاذ حسين انا متابع الموضوع بتاع سيادتك من اسابيع وعاجبنى جدا وبخلى زوجتى واخواتى يتابعوة وخصوصا السرد التفصيلى بتاع سيادتك ﻻنة مفيد جدا وانشاء الله يكون فى ميزان حسناتك ........بس اسمحلى اختلف معاك فى موضوع استخدام الايدين علشان اشاور بيهم ﻻن احنا مش بنخترع نظام جديد فى السواقة ﻻن للاسف فية ناس بتزودها وما تستعملش اﻻشارات وتكتفى باخراج ايديهم وبتخيل لو الشعب كلة بقى بيستخدم ايدية هتﻻقى كل الناس بتشوح لبعضها ونبقى ظاهرة ونعمل زى سواقين الميكروباص او النقل ....بتحس وانت ماشى جانبهم انك فى غابة او بلد مش متحضر .....ودة كلة للاسف نتيجة سوء التعليم وانتشار الفساد وخصوصا فى استخراج الرخص وكمان فى المخالفات...ومعذرة للاطالة

[husseinoo]

استاذ حسين انا متابع الموضوع بتاع سيادتك من اسابيع وعاجبنى جدا وبخلى زوجتى واخواتى يتابعوة وخصوصا السرد التفصيلى بتاع سيادتك ﻻنة مفيد جدا وإن شاء الله يكون فى ميزان حسناتك ........بس اسمحلى اختلف معاك فى موضوع استخدام الايدين علشان اشاور بيهم ﻻن احنا مش بنخترع نظام جديد فى السواقة ﻻن للاسف فية ناس بتزودها وما تستعملش اﻻشارات وتكتفى باخراج ايديهم وبتخيل لو الشعب كلة بقى بيستخدم ايدية هتﻻقى كل الناس بتشوح لبعضها ونبقى ظاهرة ونعمل زى سواقين الميكروباص او النقل ....بتحس وانت ماشى جانبهم انك فى غابة او بلد مش متحضر .....ودة كلة للاسف نتيجة سوء التعليم وانتشار الفساد وخصوصا فى استخراج الرخص وكمان فى المخالفات...ومعذرة للاطالة

شكرا لحضرتك


من عنوان الصورة
يظهر المقصود من العنوان "احمى نفسك وساعد الآخرين "

بالنسبة لاستخدام ادوات الاشارة
ممكن تستخدم اشارات السيارة
وممكن تستخدم الاشارات اليدوية اذا لزم الامر .... يعنى ممكن وبرغم انك معطى اشارة مثلا يمين ... ورغم ذلك اللى ماشى وراك موش مركز وموش شايف الاشارة .... مافيش اى مانع انك تشاور يإيديك عند الضرورة فقط
فيه كمان التواصل بالنظر .... يعنى قبل ما ادخل فى التقاطع انظر فى عين سائق السيارة الموجودة فى التقاطع .... وممكن اشاور بإيدى للتأكيد على انى ناوى اتحرك بالسيارة
طبعا فى شوارع المحروسة مسموح لك بالتواصل بكل الطرق
اشارات السيارة
اشارات يدوية
اشارات بالنظر eye contact
المهم انك توصل بالسلامة وتنجنب الاغبياء
وربك الستار فى الاول والآخر

[husseinoo]

الانتقال بين الحارات

احيانا وانت ماشى بالعربية لازم هاتحتاج تغير مكانك ... مثلا عايز تغير الحارة اللى انت ماشى فيه وتتنتقل الى حارة اخرى
احيانا تنتقل الى الحارة الاخرى بطريقة سريعة
وتتم العملية بسهولة بدون مشاكل

لكن
لازم هاتحتاج انك تستخدم الاشارات ... عشان تفهم السيارات الاخرى انك ناوى تنتقل الى حارة اخرى

التالى شوية ملاحظات تحطهم فى دماغك قبل ما تنتقل الى حارة اخرى :

1- استخدم مفتاح الاشارات ... قبلها ب 2 ثانية على الاقل
عشان باقى العربيات تعرف انت ناوى على ايه ؟ ههههههههههههه
يعنى سعادتك موش بمجرد ما تعطى الاشارة تنقل نفسك الى الحارة الثانية على طول
لأ
لازم تتظر على الاقل 2 ثانية ... والا هاتسمع صوت طاااااااااااااااااااخ او بييييييييييييييب
وحاجات وحشة مالهاش لازمة

2- بسرعة انظر الى المرايات ... سواء كانت مراية الصالون او الجانبية
وكمان انظر فوق كتفك بعينك المجردة لترى هل يوجد سيارة تمنع انتقالك الى الحارة الاخرى
طبعا معروف
ان المراية ممكن انها لا تظهر كل العربيات التى تسير خلفك
ومرة تانية بكرر
ان فيه منطقة اسمها "المنطقة العمياء" لا تظهر فيه السيارة التى تسير خلفك
عشان كده
لازم تنظر نظرة خاطفة بعينك من فوق كتفك

3- بشكل بطىء .... ابدأ فى الانتقال من حارتك الى الحارة الاخرى
لف الدركسيون براحة قوى .... المفروض انك تنتقل الى الحارة الاخرى خلال 1 الى 3 ثوانى
يعنى بلاش الحركات المفاجأة ههههههههههههه "الغرز"
اقل من كده يبقى انت بنتقل بسرعة زيادة عن اللزوم
اكثر من كده .. يبقى انت بتنتقل بشكل بطىء جدا

اخيرا
موش معنى انك اعطيت اشارة
انك ماشى صح
لازم اتأكد الاول من خلو السيارات فى الخلف
او على الاقل
انهم عارفين انك هاتنتقل لحارة اخرى

ارجوا ان اكون وفقت
مع اطيب التمنيات
اخوكم
حسين غزالة

[ahmed shohayit]

و الله يا أ حسين انت محترم جدا و ربنا يباركلـكـ
و انا بحترمكـ جدااا جداا
و اتمنى لكـ كل خير

[islamabady1980]

تسلم

[husseinoo]

و الله يا أ حسين انت محترم جدا و ربنا يباركلـكـ
و انا بحترمكـ جدااا جداا
و اتمنى لكـ كل خير

والله حضرتك اللى انسان محترم
وبحبكم كلكم
واتمنى اننا نستفيد كلنا
ونتواصل مع بعض على طول

مع اطيب التمنيات
اخوكم حسين غزالة

[husseinoo]

تسلم

الله يسلمك
ويسعدك دنيا وآخرة

مع اطيب التمنيات
اخوكم حسين غزالة

[husseinoo]

تعلم القيادة من كرسى الراكب

موش شرط نستخرج رخصة القيادة عشان نبدأ نتعلم
المفروض اننا نتعلم القيادة قبل ما نستخرج الرخصة
ونستمر فى التعلم حتى بعد استخراج الرخصة
وكل يوم هانفضل نتعلم
بالعكس
وانت راكب بجوار السائق .. هايكون عندك فرصة كبيرة للتعلم ... عندك الحرية الكاملة عشان تسال السائق بدون اى ضغوط عصبية عليك ....
تقدر تسأل والدك ... او والدتك ... او اخوك
اسأله وانت راكب بجواره ... عشان تتعلم منه

تعرف على قواعد القيادة
راقب السائق جيدا ... ماذا يفعل فى المواقف المختلفة ... هل يسير وفق قواعد المرور المتبعة ...
مثلا ماذا يفعل فى التقاطعات ... على الكبارى ... على الطرق السريعة ... فى الانفاق ..... الخ
تحدث مع والديك عن ملاحظاتك ... واطلب منهم الشرح ... عشان تفهم ... ليه اتصرفوا كده فى الموقف ده ؟

امثلة لبعض القواعد المطلوب اتباعها

• حدود السرعة المطلوبة

مثلا بتراقب سرعة السيارة على الطرق الداخلية ... على الطرق السريعة ... على الكبارى ... داخل الانفاق
كل موقف وله سرعة معينة
العلامات الخاصة بمواقف الانتظار
هل مسموح بالإنتظار ولا لأ
الخطوط المرسومة فى الشوارع
سواء كانت خطوط متصلة او خطوط متقطعة ... كل ده محتاج ملاحظة

• الاشارات

استخدام الاشارات اثناء تغيير الحارات .. اثناء الدوران فى الميادين ... اثناء الدخول يمين او شمال ... اثناء التهدئة وركن السيارة يمين او شمال

• الانتظام فى السير

هل انت ملتزم بالسير داخل الحارة تماما
ولا عمال تمشى على مزاجك ... برغم وجود خطوط بيضاء فى الشارع يجب الاستعانة بها
حتى ولو مافيش خطوط مرسومة ... كيف سوف تتصرف فى هذه الشوارع

• السماح بالمرور للآخرين

ازاى هاتتصرف لو فىه حد عايز يعدى منك
سواء كان اللى هايعدى منك سيارة او موتوسيكل او حتى السماح لاى انسان عايز يعدى امامك على رجليه ... هاتتصرف ازى؟


المرة القادمة
نتكلم "كيف تفكر كاسائق للسيارة"


مع اطيب التمنيات
اخوكم حسين غزالة

[ahmed shohayit]

جزاكـ الله خيرااااا
و اتمنى لكـ حياة سعيدة

[husseinoo]

جزاكـ الله خيرااااا
و اتمنى لكـ حياة سعيدة

كلام جميل من انسان جميل

مع اطيب التمنيات
اخوكم حسين غزالة

[husseinoo]

[B

فكر كسائق

قائد السيارة دائم التفكير ..... ليس كراكب .... لكنه يفكر كسائق ... يفكر فى المواقف المختلفة التى تدور حوله .... ولا يمكن للسائق انه يلغى تفكيره .... فى اللحظة اللى هايبطل يفكل فيها هايعرض نفسه لخطر كبير


فكر اين انت ذاهب
قبل ما انزل مشوار ... لازم اكون عارف انا رايح فين ... وهاوصل المكان ده من اى طريق ... ما بنزلش الشارع وخلاص ... وافضل اسأل واعمل مشاكل فى الطريق واعطل الدنيا كلها

فكر فى الطريق
فكر فى الطريق اللى انت اخترته .. فكر فى التقاطعات والميادين اللى هاتقابلك ... تخيلها فى ذهنك .. وفكر هاتتصرف ازاى فى المواقف المختلفة

اذا كنت موش عارف الطريق
اسأل قبل ما تمشى ... استخدم خريطة ورقية ... ودى جميلة جدا ورخيصة ... وممكن تستخدم "google map"
المهم الكلام ده تعمله فى البيت موش وانت ماشى على الطريق
وفيه ناس عندها فى الموبايل "gps" وده بصراحة ممتاز جدا ... ببساطة هاتعرف انت فين


الوقت
حاول تنزل بدرى شوية ... عشان تمشى براحتك وبدون استعجال ... وتوصل فى ميعادك بدون قلق ... ولو قدرت تروح المشوار ده فى يوم بدرى شوية ... وتتعرف على المكان قبل ما تروحه فى اوقات الزحمة يبقى هايل
يعنى انا مثلا كنت عايز اروح السيدة زينب ... ببساطة نزلت يوم الجمعة الصبح بدرى ... ولفيت السيدة زينب اكثر من مرة ... لحد ما حفظت المكان كويس .... دلوقتى الحمد لله ... لو نزلت فى اى وقت خلاص حفظت الطريق ... والطرق الجانبية لو حصلت اى ظروف


وانت ماشى
على الطريق خلاص انت عرفت هاتبدأ منين .... وعارف متى سوف تهدأ من سرعتك ... ومتى سوف تزيد من سرعة السيارة .... وفى اى منطقة سوف تراعى الاشارات والتقاطعات .... ومتى هاتغير حارتك ... وامتى هاتلف يمين او شمال .... كل ده انت راجعته قبل ما تنزل الشارع ... وهاتبدأ تنفيذه بدقة


ماتسرحش
ما تفكرش فى اى حاجة غير الطريق ... وركز وانت ماشى كويس جدا
هههههههههه
يعنى انا رايح المعادى
وماشى على الكورنيش
وبدل ما اوصل المعادى ... طلعت كوبرى غلط ... وجدت نفسى ماشى على طريق حلوان تقريبا
ههههههههههه
المهم رجعت تانى وربنا ستر
السرحان موش كويس .... حتى ولو انت مذاكر الطريق

وبعد ما توصل
فكر ايه اللى حصل وانت ماشى
ايه اللى لازم تاخد بالك منه فى المرة اللى جاية
التقاطعات
المناطق المزدحمة
المناطق المكسرة فى الطريق ههههههههههه والمطبات اللى انت كلتها وانت ماشى
فكر المرة اللى جاية ان شاء الله هاتعمل ايه ؟
عشان توصل بالسلام


القيادة
موش مجرد مهارات لتحريك السيارة
كل يوم هانتعلم مع بعض حاجة جديدة ان شاء الله


المرة القادمة
كيف تحسب المسافات


مع اطيب التمنيات
اخوكم حسين غزالة

[/B]

[tota fatoka]

موضوع جميل قوووووى

[tota fatoka]

السلام عليكم أستاذ حسين
موضوع حلوووووو قووووى ومجهود راءع
أحب أقولكم أنى مستجدة فى السواقة بسوق اوتوماتيك وبتعبير اللى بيسوق مانيوال بطل
الحمد لله اتعلمت وبقيت اروح بالعربيه الشغل فى سموحه وانا ساكنه فى ميامي ووديت الولاد سان إستيفانو ورحت فتح الله
طيب فين المشكلة ؟؟؟
المشكلة دلوقتي بقالى ١٠ ايام مطلعتش بالعربيه ليه مش عارفه جوزى أجازه وبيودينى ويجيبنى وانا مرتاحه كده يعنى مكسله ورجعت أخاف تانى مع ان الخوف مكنش راح اولانى
انا حسه ان الموضوع نفسى وعارفه ان ١٠ ايام مش كتير بس كتير لمبتدءه زىى
خصوصا ان الموضوع اتكرر معايا لما خبطت مره وانا رايحه الشغل وداخله سموحه من ناحيه كيروسيز وماشيه فى حارتى كان فيه عربيه ماشيه فى نفس اتجاه العربيات اللى داخله سموحه زىى بس هو ماشى فى الحارة اللى خارجه من سموحه على شارع أبوقير اتفاجىء بتوكتوك قدامه فحب يدخل معانا فى حارتنا اللى داخله سموحه فكسر جامد عليا مع أنى فرملت ومقدرش المسافة اللى داخل عليها اللى هى بينى وبين العربية اللى قدامى الحمدلله كانت بسيطه رفرف واكسدام رديت الرفرف عشان الباب مكنش بيفتح بسهوله وسايبه الاكسدام محتاج دهان عشان العين ههههههههه
المهم بعد الخبطه دى قعدت أسبوع لحد ما رجعت اسوق تانى يعنى الموضوع اتكرر أنى انقطع عن السواقة وده مضايقنى وعاوزه اتغلب عليه خصوصا أنى لسه فى الاول

[eslamavitch]

السلام عليكم
ربنا بجد يكرمك على المجهود اللى انت بتعملة يا استاذ حين بجد مجهود جبار انا على فكرة بقرا فى الموضوع بقالى حوالى 5 ايام ودلوقتى فى الصفحة 73 المهم انا طبعا مبتدا ومطلع رخصة من 7 سنين وكنت اخدت كورس كدة برضة من 7 سنين وطلعت الرخصة بواسطة المهم انا جبت عربية دلوقتى وجربت اسوق ولقيت نفسى كويس لدرجة انى مشيت على 130 على الكورنيش فى اسكندرية وكنت مبسوط وعندى ثقة فى نفسى تانى مرة نزلت خبطت ضهر العربية ففى عبية تلاجة نقل والازاز اللى عندى اللى ورا وقع كلة وطبعا فقدت الثقة خالص وبقت بمشى على اقل من مهلى ولازم يكون معياا حد وطبعا عندى مشكلة فى الركنة وعندى مشكلة انى مش بتحرك بالعربية كتير ولازم يكون حد معايا لدرجة انى فكرت ابيع العربية من خوفى اللى نتج من الخبطة مش عارف بفكر اشوف حد يدربى تانى غير صحابى وقريبى وطبعا والدى بيسوق بقالى 15 سنة بس لما بيركب معايا بتلبش ويخوفنى زيادة مش عارف اعمل اية